Aamad-e-Rasool आमद-ए-रसूल آمدِ رسول

 ::آمدِ رسول ::
وہ اُترا نورِ مجسّم کہ جگ اُجارا ہوا
کمالِ لطفِ خداوند آشکارا ہوا
تمام عالمِ ارواح، ہست و بوٗد میں خوب
خوشی کی موج اُٹھی ، جشن کا نظارہ ہوا
چھپائے منھ کو چلِیں ظلمتیں زمانے کی
شکم سے آمنہ بی کے عجب اُجارا ہوا
کنگورے گر پڑے سجدے میں قصرِ کِسریٰ کے
نزولِ رحمتِ عالم جو آشکارا ہوا
سبھی کی سانسوں میں پھر سانس آ گئی تشنہ
جُمودِ ظلمتِ شب ختم، حق کا یارا ہوا
ربیع الاول 12، 1442 ھ
نومبر 10، 2019 اندور ،انڈیا
کلام : مسعود بیگ تشنہ